PRAMEHAM

   പ്രമേഹരോഗ നിയന്ത്രണം 

    

പ്രമേഹം ലോകമെമ്പാടും വളരെയധികം ആളുകളെ ബാധിക്കുന്ന ഒരു ജീവിതശൈലി രോഗമാണ്. ഡയബറ്റിസ് മെലിറ്റസ് എന്നും അറിയപ്പെടുന്ന പ്രമേഹം ഉപാപചയ വൈകല്യങ്ങളുടെ ഒരു കൂട്ടമാണ്. സാധാരണക്കാർക്കിടയിൽ 'ഷുഗർ' അല്ലെങ്കിൽ ‘പഞ്ചസാരയുടെ അസുഖം’ എന്ന് പൊതുവേ അറിയപ്പെടുന്ന ഈ രോഗാവസ്ഥ ഇന്ന്‌ ചെറുപ്പക്കാർക്കിടയിൽ പോലും വളരെ വ്യാപകമാണ്. ലോകത്തിൽ ഏറ്റവും അധികം പ്രമേഹ രോഗികളുള്ള രാജ്യമാണ് ഇന്ത്യ. ഇന്ത്യയിൽ ഏറ്റവും കൂടുതൽ പ്രമേഹരോഗം കാണുന്നത് കേരളത്തിലാണ്.മുതിർന്നവരിൽ ഏകദേശം 20 ശതമാനത്തോളം പേർക്കും പ്രമേഹം ഉണ്ട് എന്നാണ് ICMR കണക്കാക്കിയിട്ടുള്ളത്.ദേശീയ ശരാശരി ഏകദേശം 13 ശതമാനം ആണ്. ഇതുകൂടാതെ കേരളത്തിലെ നല്ല ഒരു ശതമാനം ആളുകളും പ്രീ-ഡയബറ്റിക് ആണ് (പ്രമേഹ രോഗം നിർണ്ണയിക്കുന്നതിന് മുൻപ് ഉള്ളവസ്ഥ). ശരീരത്തിലെ ഒട്ടുമിക്ക അവയവങ്ങളുടെ പ്രവർത്തനങ്ങളെയും ബാധിക്കുന്ന ഒരു ഗുരുതരമായ രോഗമാണ് പ്രമേഹരോഗം. വളരെക്കാലം നീണ്ടുനിൽക്കുന്ന ഉയർന്ന രക്തത്തിലെ പഞ്ചസാരയുടെ അളവ് (ഹൈപ്പർ ഗ്ലൈസീമിയ) ആണ് പ്രമേഹം എന്ന അവസ്ഥ. ശരീരത്തിലെ രക്തത്തിലെ ഗ്ലുക്കോസിൻറെ അളവ് കൂടുന്നതാണ് പ്രമേഹത്തിൻ്റെ പ്രധാനകാരണം. ഇത് നിയന്ത്രണത്തിലാക്കാത്ത പക്ഷം ഹൃദയരോഗം, നാഡീവ്യൂഹ സംബന്ധമായ പ്രശ്നങ്ങൾ, കിഡ്നി രോഗങ്ങൾ,നേത്ര രോഗങ്ങൾ,തുടങ്ങിയവയ്ക്കു വഴിവെക്കും. 

തരം തിരിക്കൽ 

പ്രമേഹം പൊതുവെ രണ്ടു തരത്തിലാണ് കാണപ്പെടുന്നത്. 

• ടൈപ്പ് 1 - പാൻക്രിയാസ് ഇൻസുലിൻ എന്ന ഹോർമോൺ നിർമ്മിക്കാത്തതാണ് ഇതിനു കാരണം. മുൻപ് ഈ അവസ്ഥക്ക് ഇൻസുലിനധിഷ്ടിതമല്ലാത്ത പ്രമേഹം (നോൺ ഇൻസുലിൻ ഡിപെൻഡൻറ്)  അല്ലെങ്കിൽ ശൈശവ പ്രമേഹമെന്നാണ് അറിയപ്പെട്ടിരുന്നത്. ഇൻസുലിൻ തീരെ കുറയുന്നു അല്ലെങ്കിൽ  ഐലെറ്റ്സിലെ ബീറ്റാ കോശങ്ങൾ നശിച്ചു പോകുകയോ പ്രവർത്തിക്കാതിരിക്കുമ്പോഴോ ആണ് ഇതുണ്ടാകുന്നത്. സാധാരണയായി ചെറുപ്പത്തിലോ ബാല്യകാലങ്ങളിലോ തുടങ്ങുന്ന അവസ്ഥയ്ക്ക് ഇനിയും കൃത്യമായ കാരണങ്ങൾ അറിയാത്തതുകൊണ്ട് ജനിതകരോഗമായി കണക്കാക്കാം.
• ടൈപ്പ് 2 - ജീവിതശൈലി പ്രശ്നങ്ങളാലാണ്‌ ഇത് ഉണ്ടാവുന്നത്. വ്യായായ്മ ഇല്ലായ്മ, അമിതഭാരം, ഭക്ഷണ ശീലങ്ങൾ എന്നിവ ഇതിനു കാരണമാകാം.40 വയസ്സിനുമുകളിലുള്ളവരേയും ശരീരഭാരം കൂടിയവരേയും ബാധിക്കാവുന്ന പ്രമേഹരോഗാവസ്ഥയാണ് ടൈപ്പ് II ഡയബെറ്റിസ്). ഇൻസുലിൻ എന്ന ആന്ത:ഗ്രന്ഥിസ്രാവത്തിന്റെ ഉല്പാദനം ശരീരത്തിന്റെ മൊത്തം ആവശ്യത്തിനു വേണ്ടത്ര തികയാതിരിക്കുമ്പോൾ ഇത്തരം പ്രമേഹം വരാം.  

മറ്റു പ്രമേഹ അവസ്ഥകൾ 

• ഗർഭകാല പ്രമേഹം ( ഗെസ്റ്റേഷനൽ ഡയബെറ്റിസ് )

 ഗർഭാവസ്ഥയിൽ ചില സ്ത്രീകൾക്ക് പിടിപെടുന്ന പ്രമേഹം (ജി.ഡി.എം.) (ജെസ്റ്റേഷണൽ ഡയബറ്റിസ് മെല്ലിറ്റസ്) എന്ന് അറിയപ്പെടുന്നു.ഗർഭിണിയാകുന്നതോടെ മിക്കവാറും സ്ത്രീകൾക്ക് ഇൻസുലിൻ പ്രതിരോധം കൂടുന്നു (ഗർഭകാലത്തു രക്തത്തിലെ ഗ്ളൂക്കോസ് അളവ് കൂടുന്നത് മൂലമാണ് ഇത് ഉണ്ടാവുന്നത്). 2 മുതൽ 4 ശതമാനം വരെ ഗർഭിണികളിൽ ഇത് ഒരു താൽക്കാലികപ്രമേഹാവസ്ഥയായി പരിണമിക്കാം. ഇത് പ്രസവത്തോട് കൂടി അപ്രത്യക്ഷമാകാറുണ്ട്. ഗർഭാവസ്ഥാപ്രമേഹം ബാധിക്കുന്ന സ്ത്രീകൾക്ക് പിൽക്കാലത്ത് മേൽപ്പറഞ്ഞ തരം 2 പ്രമേഹം വരാനുള്ള സാദ്ധ്യത കൂടുതലുണ്ട്. 

• സെക്കൻഡറി ഡയബെറ്റിസ്

ആഗ്നേയഗ്രന്ഥിയുടെ വീക്കം, ചില പ്രത്യേക മരുന്നുകളുടെ ഉപയോഗം (eg : ഡൈ യൂറേറ്റിക്സ്, സ്റ്റിറോയ്ഡുകൾ തുടങ്ങിയവ) എന്നിവ മൂലം പ്രമേഹാവസ്ഥ ഉണ്ടാകാം. ഇത്തരം പ്രമേഹത്തെ സെക്കൻഡറി ഡയബെറ്റിസ് എന്നറിയപ്പെടുന്നു.

• ഇമ്പയേർഡ് ഗ്ളൂക്കോസ് ടോളറൻസ് (പ്രീ ഡയബെറ്റിസ്)

ചില ആളുകളിൽ തുടക്കത്തിൽ രക്തത്തിലെ പഞ്ചസാരാ സാധാരണ അളവിൽ നിന്നും കൂടി പക്ഷെ പ്രമേഹത്തിന്റെ അളവിലേക്ക് എത്താതെ നിൽക്കും. ഈ അവസ്ഥയെ പ്രീ ഡയബെറ്റിസ്  എന്ന് വിളിക്കുന്നു..ഇത്തരം ആളുകൾ ഭക്ഷണത്തിലും വ്യായാമത്തിലും ശ്രദ്ധിച്ചാൽ സാധാരണ നിലയിലേക്ക് തിരിച്ചു പോകാൻ സുഖമാമാണ്.

കാരണങ്ങൾ

വിവിധ കാരണങ്ങൾ മൂലം പ്രമേഹം ഉണ്ടാകുന്നു. തെറ്റായ ജീവിതശൈലിയാണ് ഒരു പ്രധാന കാരണം എങ്കിലും  ഒന്നിലധികം കാരണങ്ങൾ പ്രമേഹം ഉണ്ടാക്കുന്നു.

• പാരമ്പര്യഘടകങ്ങൾ
• സ്വയം പ്രതിരോധജന്യം- ഇൻസുലിൻ ഉത്പാദിപ്പിക്കുന്ന കോശങ്ങളെ ശരീരം സ്വയം നശിപ്പിക്കാൻ ശ്രമിച്ചാൽ അത് പ്രമേഹത്തിനു വഴിവെക്കും.
• വ്യായാമക്കുറവ്
• അനാരോഗ്യകരമായ ഭക്ഷണം- അമിതമായി ഊർജവും കൊഴുപ്പും അടങ്ങിയ ഭക്ഷണങ്ങൾ, അന്നജം കൂടുതൽ അടങ്ങിയ ചോറ്, ഗോതമ്പ്, മരച്ചീനി, പഞ്ചസാര, മധുര പാനീയങ്ങൾ, പലഹാരങ്ങൾ, വറുത്തതും പൊരിച്ചതും തുടങ്ങിയവയുടെ അമിത ഉപയോഗം.
• പോഷകാഹാരക്കുറവ്- പഴങ്ങൾ, പച്ചക്കറികൾ, പരിപ്പുവർഗങ്ങൾ എന്നിവയുടെ ഉപയോഗക്കുറവ്.
• പുകവലിയും മദ്യാസക്തിയും  
• കൊഴുപ്പും രക്താദിസമ്മർദവും
• അമിതവണ്ണം
• കുടവയർ 
• മാനസിക പിരിമുറുക്കം
• ക്ഷീണം 

ലക്ഷണങ്ങൾ

• ഇടയ്ക്കിടെയുള്ള മൂത്രമൊഴിക്കൽ (അമിത മൂത്രം)
• അമിത ദാഹം 
• അമിത ക്ഷീണം
• ഭാരക്കുറവ്
• മധുരത്തോട് ആസക്തി
• മുറിവുണങ്ങാൻ താമസം
• ലൈംഗികശേഷിക്കുറവ്
• ലൈംഗിക താല്പര്യക്കുറവ് 
• ചർമ്മത്തിലുള്ള അസ്വസ്ഥത 

എന്നിവയാണ് പ്രധാന ലക്ഷണങ്ങൾ. ഈ ലക്ഷണങ്ങളിൽ ഏതെങ്കിലും കാണപ്പെടുമ്പോൾ ഡോക്ടറുടെ നിർദ്ദേശപ്രകാരം രക്ത ഗ്ളൂക്കോസ് പരിശോധന നടത്തേണ്ടത് അത്യാവശ്യമാണ്. ചികിത്സിച്ചില്ലെങ്കിൽ, പ്രമേഹം പല ആരോഗ്യ പ്രശ്‌നങ്ങൾക്കും കാരണമാകും.

ഉപദ്രവങ്ങൾ (സങ്കീർണ്ണതകൾ)

• ഡയബറ്റിക് കെറ്റോഅസിഡോസിസ്
• ഹൈപ്പർ  ഗ്ലൈസെമിക് അവസ്ഥ
• ഹൃദയ സംബന്ധമായ അസുഖം
• ഹൃദയാഘാതം
• പക്ഷാഘാതം
• വിട്ടുമാറാത്ത വൃക്കരോഗം
• കാലിലെ അൾസർ
• ഞരമ്പുകൾക്ക് കേടുപാടുകൾ
• ബുദ്ധി വൈകല്യം 
• കണ്ണുകൾക്ക് കേടുപാടുകൾ 
• കാഴ്ച ശക്തി നഷ്ട്ടപ്പെടുന്നു (Diabetic Retinopathy)
• സ്പർശനശേഷി നഷ്ടമാകുന്നു
• കായികശേഷി നഷ്ട്ടപ്പെടുന്നു
• ലിംഗത്തിന്റെ അഗ്രചർമ്മം, യോനി, മൂത്രാശയം എന്നിവിടങ്ങളിൽ അണുബാധ
• പ്രമേഹം പുരുഷന്മാരിലെ ബീജത്തിന്റെ രൂപഘടന, ബീജങ്ങളുടെ എണ്ണം, ബീജത്തിന്റെ അളവ്, ലിംഗ ഉദ്ധാരണം എന്നിവയെ ബാധിക്കുന്നു. ചികിത്സ കൂടാതെ, ഇത് സ്ഥിരമായ വന്ധ്യതയിലേക്ക് നയിച്ചേക്കാം.
• സ്ത്രീകളിൽ വിട്ടുമാറാത്ത പ്രമേഹം പിസിഒഎസ്, പൊണ്ണത്തടി, അസാധാരണമായ ആർത്തവചക്രം, വേദനാജനകമായ ലൈംഗികബന്ധം ഉണ്ടാക്കുന്നതിനു പുറമേ സ്ത്രീകളുടെ പ്രത്യുത്പാദന ശേഷിയെ ബാധിക്കുന്നു.
• ഗർഭാവസ്ഥയിൽ- അധിക രക്തത്തിലെ പഞ്ചസാര ഗർഭാവസ്ഥയിലെ പ്രമേഹത്തിലേക്ക് നയിക്കുന്നു, ഇത് പ്രീക്ലാമ്പ്സിയ വികസിപ്പിക്കുന്നതിനുള്ള പ്രേരക ഘടകമാണ്. സ്ത്രീകളിലെ പ്രമേഹം വികസിക്കുന്ന കുഞ്ഞിനെ ദോഷകരമായി ബാധിക്കുകയും, ജന്മനായുള്ള പ്രശ്നങ്ങളിലേക്ക് നയിക്കുകയും, ഒരുപക്ഷേ ഗർഭം അലസലിന് കാരണമാവുകയും ചെയ്യും.
• മരണo

പ്രമേഹത്തിനു എതിരെയുള്ള മുൻകരുതൽ

• ആരോഗ്യകരമായ ഭക്ഷണരീതി 
• പഞ്ചസാരയും എണ്ണയും കൊഴുപ്പും കുറയ്ക്കുക 
• പച്ചക്കറിയും, പഴവർഗ്ഗങ്ങളും, പരിപ്പുവർഗ്ഗങ്ങളും ധാരാളം ഭക്ഷണത്തിൽ ഉൾപ്പെടുത്തുക 
• വ്യായായ്മ ദിവസേന കുറഞ്ഞത് 45 മിനുട്ട് എങ്കിലും ചെയ്യുന്നതിലൂടെ ശരീര ഭാരം നിയന്ത്രിക്കാനും ഇൻസുലിന്റെ ഉത്പ്പാദനം കൂട്ടാനും സാധിക്കുന്നു
• ശരീരഭാരവും രക്തസമ്മർദ്ദവും കൊളെസ്റ്ററോളും നിയന്ത്രിക്കുക 
• മാനസികസമ്മർദ്ദം കുറയ്ക്കുക
• ചൂടുവെള്ളം കുടിക്കുക 
• ശരിയായ ഉറക്കം 
• മുൻ‌കരുതൽ എന്ന നിലയ്ക്ക് കൃത്യമായ കാലയളവിൽ രക്തപരിശോധന നടത്തേണ്ടതാണ്‌. ഭക്ഷണം കഴിക്കാതെയും കൃത്യമായ സമയത്ത് ഭക്ഷണം കഴിച്ചുമാണ്‌ പരിശോധന നടത്തേണ്ടത്. 

ചികിത്സ 

• പ്രമേഹം അയുഷ്ക്കാലം വരെ നീണ്ടു നിൽക്കുന്ന ഒരു രോഗമാണ്. ഇതിനെ നിയന്ത്രിച്ചു നിർത്തുവാനല്ലാതെ പൂർണമായും മാറ്റുവാൻ സാധിക്കുകയില്ല. ആധുനിക വൈദ്യ ശാസ്ത്രത്തിൽ ഫലപ്രദമായ ചികിത്സ നിലവിലുണ്ട്. രോഗി അവന്റെ ജീവിതാന്ത്യം വരെ മരുന്നുകൾ തുടരേണ്ടതായി വന്നേക്കാം. അങ്ങനെ ക്വാളിറ്റി  ഓഫ്  ലൈഫ്  മെച്ചപ്പെടുത്താം.
• രക്തത്തിലെ പഞ്ചസാരയുടെ അളവ് സാധാരണനിലയ്ക്ക് ഏറ്റവും അടുത്ത് നിലനിർത്തുകയും പഞ്ചസാര കുറഞ്ഞുപോകാതെ നോക്കുകയും ചെയ്യുക എന്നതാണ് ചികിത്സയുടെ അടിസ്ഥാനം. 
• ഭക്ഷണനിയന്ത്രണം
• വ്യായാമം 
• ഔഷധങ്ങൾ എന്നിവ ഉപയോഗിച്ച് പഞ്ചസാരയുടെ അളവ് നിരന്തരം  നിയന്ത്രിക്കാവുന്നതാണ്. 
• ഭക്ഷണ നിയന്ത്രണമാണ് ഏറ്റവും പ്രധാനം.കഴിച്ച ഉടനെ രക്തത്തിലെ പഞ്ചസാരയെ പൊടുന്നനെ ഉയർത്തുന്ന ഗ്ലൈസീമിക്‌ ഇൻഡക്സ് ഉയർന്ന ഭക്ഷണ പദാർത്ഥഥങ്ങളുടെ ഉപയോഗം പരമാവധി കുറയ്ക്കുകയും താഴ്ന്ന ഗ്ലൈസീമിക് ഇൻഡക്സ് ഉള്ളവ കൂടുുതൽ ഉൾപെടുത്തുകയും വേണം. പയറ് യും കൃത്യമായ സമയത്ത് ഭക്ഷണം കഴിച്ചുമാണ്‌ പരിശോധന നടത്തേണ്ടത്. വർഗ്ഗങ്ങൾ, കടല, ഇലക്കറികൾ, പച്ചക്കറികൾ പപ്പായ, മുഴുവൻ തവിടുനീക്കാത്തത ധാന്യങ്ങൾ ഇവയെല്ലാം ഗ്ലൈസീമിക് ഇൻഡക്സ് കുറഞ്ഞ വസ്തുക്കളാണ്.
• രോഗികളെ വിവരങ്ങൾ മനസ്സിലാക്കിക്കുക, ചികിത്സയിൽ പങ്കാളികളാക്കുക എന്നീ കാര്യങ്ങൾ അത്യാവശ്യമാണ്. പഞ്ചസാരയുടെ നില നന്നായി നിയന്ത്രിക്കപ്പെടുന്നവരിൽ രോഗത്തിന്റെ സങ്കീർണ്ണാവസ്ഥകൾ വളരെക്കുറവായാണ് കാണപ്പെടുന്നത്. 
• പുകവലി, കൊളസ്റ്ററോൾ വർദ്ധന, പൊണ്ണത്തടി, രക്താതിമർദ്ദം, കൃത്യമായ വ്യായാമം ഇല്ലാതെയിരിക്കുക എന്നീ പ്രശ്നങ്ങൾ ഒഴിവാക്കുന്നതും രോഗത്തിന്റെ സങ്കീർണ്ണാവസ്ഥകൾ ഒഴിവാക്കാൻ സഹായകമാണ്.
• കൂടാതെ പച്ചനെല്ലിക്ക നീരും മഞ്ഞൾപൊടിയും  ചേർത്ത് പതിവായി വെറുംവയറ്റിൽ കഴിക്കുന്നത് പ്രമേഹത്തിനെ നിയന്ത്രിക്കാൻ  സഹായിക്കുന്നു.
• ത്രിഫല മുതലായവ അവസ്ഥാനുസരണം പ്രയോജനപ്പെടുത്താം.
• പഞ്ചകർമ്മ തെറാപ്പിയിലൂടെ ശരീരത്തിലെ ദോഷങ്ങൾ കളഞ്ഞു ശുദ്ധീകരിക്കാനും ദോഷശമീകരണം നടത്തുവാനും സാധിക്കുന്നു.