പക്ഷാഘാതവും ആയുർവേദവും

        പ്രസവാനന്തര ശുശ്രൂക്ഷ ആയുർവേദത്തിലൂടെ 

ഞാൻ ഇന്നിവിടെ പ്രസവാനന്തര ശുശ്രൂക്ഷ ആയുർവേദത്തിലൂടെ എന്ന വിഷയത്തെ കുറിച്ചാണ് വിവരിക്കുന്നത്.

      ഇന്ന് കൂട്ടുകുടുംബ വ്യവസ്ഥ മാറി അണുകുടുംബ വ്യവസ്തയിലൂടെ ആണ് നാം സഞ്ചരിച്ചു കൊണ്ടിരിക്കുന്നത്. ആയുർവേദത്തിൽ നിർദ്ദേശിക്കുന്നത് പോലെ 3 മാസം വിശ്രമം എടുത്ത് പ്രസവ രക്ഷ ചെയ്യുന്നത് പ്രായോഗികമാക്കാൻ അല്പം ബുദ്ധിമുട്ടാണ്.

അതുകൊണ്ടുതന്നെ ഏകദേശം ഒന്നരമാസക്കാലം വിശ്രമിച്ചു ആയുർവേദത്തിൽ വിധിച്ചിരിക്കുന്ന പോലെയുള്ള പരിചരണം ലഭിക്കുകയാണെങ്കിൽ അമ്മയ്ക്കും കുഞ്ഞിനും പൂർണ ആരോഗ്യം ലഭിക്കുന്നതിന്  പ്രയോജനപ്പെടും.

 സാധാരണഗതിയിൽ ആദ്യത്തെ പ്രസവത്തിനു മാത്രമേ ഇന്ന് പ്രസവരക്ഷ അല്ലെങ്കിൽ ശുശ്രൂക്ഷ മിക്കവാറും ചെയ്തു കാണുന്നുള്ളൂ. എന്നാൽ ഓരോ പ്രസവത്തിനും പ്രത്യേകം പ്രത്യേകം ശുശ്രൂക്ഷ ചെയ്യേണ്ടതാണ്. 

       ഇന്ന് 2 രീതിയിൽ ആണ് പ്രസവം നടക്കുന്നത്.

        1) സാധാരണ പ്രസവം (നോർമൽ ബർത്ത് )

        2) സിസ്സേറിയൻ

                    സാധാരണ പ്രസവം കഴിഞ്ഞാൽ നമുക്ക് ഉടൻ തന്നെ പ്രസവ രക്ഷ ചെയ്യാവുന്നതാണ്. എന്നാൽ സിസ്സേറിയൻ ആണെങ്കിൽ ആദ്യത്തെ 15 ദിവസം കഴിഞ്ഞു ആന്റിബയോട്ടിക് മുതലായ ഔഷധങ്ങൾ തീർന്നതിന് ശേഷം മുറിവുകൾ പൂർണമായും ഉണങ്ങിയതിനു ശേഷം മാത്രമാണ് പ്രസവരക്ഷ നടത്തേണ്ടത്. കൃത്യമായ പോഷക സമ്പുഷ്ടമായ സമീകൃത ആഹാരം നൽകുക എന്നതാണ് ഏറ്റവും പ്രധാനം. അതോടൊപ്പം തന്നെ ഓരോ വ്യക്തികൾക്കും അനുയോജ്യമായ  രീതിയിലുള്ള കുഴമ്പുകൾ ഡോക്ടറുടെ നിർദ്ദേശാനുസരണം തിരഞ്ഞെടുത്തു ഉപയോഗിക്കുന്നത് തടവലിലും സ്വേദകർമത്തിലും കുളിയിലും പ്രധാനമാണ്. ഒമ്പതു മാസത്തെ സ്ട്രെസ്സും സ്‌ട്രെയിനും അനുഭവിച്ചതിനു ശേഷം ക്ഷീണിച്ചിരിക്കുന്ന സ്ത്രീയുടെ ഗർഭാശയത്തിൽ ഉണ്ടാകുന്ന വ്യതിയാനങ്ങളെ സാധാരണഗതിയിലേക്കു കൊണ്ടുവരികയും പേശികളുടെയും മസിലുകളുടെയും വലിച്ചിൽ മാറ്റിയെടുക്കുകയും പ്രസവത്തോടു അനുബന്ധിച്ചു ഉണ്ടാവുന്ന സ്ട്രെച്ഛ് മാർക്കുകൾ മാറ്റുകയും സ്ത്രീ സെക്സ് ഹോർമോൺസ് സാധാരണ ഗതിയിലേക്ക് കൊണ്ടുവരികയും ദഹന പ്രക്രിയയെ സാധാരണഗതിയിലേക്കു കൊണ്ടുവരികയും നല്ല മാനസികാരോഗ്യം ഉണ്ടാക്കുകയും വയറിൻറെ ചാട്ടം ഒഴിവാക്കുകയും മുതലായവയുമാണ് പ്രസവരക്ഷ കൊണ്ട് ഉദ്ദേശിക്കുന്നത്. കുഞ്ഞിന് ഏറ്റവും നല്ല പോഷക ഘടകവും ഇമ്മ്യൂണിറ്റി ബൂസ്റ്റർ ആയ മുലപ്പാൽ ശുദ്ധീകരിച്ചും വർധിപ്പിച്ചും ആരോഗ്യ പ്രദമായ കുഞ്ഞിനെ വാർത്തെടുക്കുക ഹീലിംഗ് പ്രോസസ്സ് ശക്തിപ്പെടുത്തുക സ്ത്രീയുടെ ഓജസ്സും തേജസ്സും വർധിപ്പിച്ചു യൗവ്വനയുക്ത ആക്കുക തുടങ്ങിയവയും ആയുർവേദ പ്രസവരക്ഷയിലൂടെ സാധിക്കുന്നു. കൂടാതെ പ്രസവം മൂലം ഉണ്ടാകുന്ന നടുവേദന ഇല്ലാതാക്കാനും ഇതുകൊണ്ട് കഴിയുന്നു. ഓരോ വ്യക്തിയുടെയും ശരീരഘടനയും ദഹനപ്രക്രിയയും വ്യത്യാസമായി ഇരിക്കയാൽ തീർച്ചയായും ഓരോ ആയുർവേദ ഡോക്ടറുടെ നിർദ്ദേശപ്രകാരം മാത്രമേ പ്രസവരക്ഷ നടത്താൻ പാടുള്ളു. ശരീരത്തിൽ കാൽസ്യം കൂടുതൽ ഉണ്ടാക്കാൻ വേണ്ടി ചെറിയ മത്സ്യങ്ങൾ മുട്ടയുടെ വെള്ള മുതലായവ ഉപയോഗിക്കുന്നത് ഉത്തമമാണ്. മുരിങ്ങക്കായ,മുരിങ്ങയില, ചീര മുതലായവ രക്തവർദ്ധകമായ പച്ചക്കറികൾ ധാരാളം ഉപയോഗിക്കുക. ആദ്യത്തെ ദിവസങ്ങളിൽ ദഹനപ്രക്രിയ ശരിയാക്കുന്ന രീതിയിലുള്ള ആഹാരങ്ങളും പിന്നീട് ശരീരത്തെ പോഷിപ്പിക്കുന്ന ആഹാരവുമാണ് നൽകേണ്ടത്. എരിവും പുളിയും പരമാവധി കുറയ്ക്കുക. വാളൻപുളിക്ക് പകരം ഔഷധഗുണം കൂടുതലുള്ള കുടംപുളി ഉപയോഗിക്കുന്നതാണ് നല്ലത്. രണ്ടുനേരവും പാൽ കുടിക്കുക.

                                           

ശതാവരി കിഴങ്ങു, പാൽമുതുക്കിൻ കിഴങ്ങു എന്നിവ ഇട്ടു തിളപ്പിച്ച പാൽ മുലപ്പാൽ വർദ്ധിപ്പിക്കുവാൻ സഹായിക്കുന്നു. മോര് കറിയാക്കി ഉപയോഗിക്കുന്നതാണ് ദഹനപ്രക്രിയയുടെ ഉത്തേജനത്തിനു നല്ലത്. വെള്ളം ധാരാളം കുടിക്കുക.

കുട്ടികളിൽ സാധാരണയായി കാണാറുള്ള ത്വക്ക് രോഗങ്ങൾ അഥവാ റാഷസ് ഒഴിവാക്കുവാൻ കരിങ്ങാലി,പതിമുഖം തുടങ്ങിയ ഔഷധങ്ങൾ ഇട്ടു തിളപ്പിച്ച വെള്ളം കുടിക്കുന്നതാണ് ഉത്തമം. എപ്പോഴും ശരീരത്തെ തണുപ്പിക്കുന്ന ആഹാരം ആണ് ഉപയോഗിക്കേണ്ടത്. ചെറിയതോതിൽ ഉള്ള വ്യായാമങ്ങൾ ചെയ്യുന്നതിൽ തടസ്സമില്ല. 

കോട്ടൺ തുണി ഉപയോഗിച്ച് ശാസ്ത്രീയമായി വയർ കെട്ടിവെക്കുന്നത് വയർചാട്ടം കുറക്കുന്നതിന് നല്ലതാണ്. ആഹാരം പോലെ തന്നെ പ്രധാനമാണ് ഉറക്കവും ചുരുങ്ങിയത് ഏഴു മണിക്കൂർ എങ്കിലും പ്രസവിച്ച സ്ത്രീ ഉറങ്ങേണ്ടത് അനിവാര്യമാണ്. രണ്ടുമണിക്കൂർ ഇടവിട്ട് കുഞ്ഞിന് മുലപ്പാൽ നൽകേണ്ടിവരുന്ന സാഹചര്യത്തിൽ ഉറക്കം കുറയാൻ സാധ്യത ഉണ്ട് എങ്കിലും ഏഴുമണിക്കൂർ തന്നെ ഉറങ്ങുവാൻ ശ്രമിക്കണം. 

ഉള്ളിൽ ചെയ്യുന്ന ചികിത്സ കർമ്മങ്ങൾ പോലെ തന്നെ പുറമെ ചെയ്യുന്ന ചികിത്സാകർമ്മങ്ങൾക്കും ഒരേപോലെ  പ്രാധാന്യം അർഹിക്കുന്നുണ്ട്. കൃത്യമായ കുഴമ്പുകൾ ഉപയോഗിച്ചുള്ള തടവലുകൾ, വേദ്‌കുളി, എന്നിവ പരിചരണത്തിന്റെ തുടക്കദിവസങ്ങളായ ഇരുപത്തിയൊന്ന് ദിവസവും ചെയ്യേണ്ടതാണ്. 

                                        

 വേദ്‌കുളി- നൽപ്പാമരപ്പട്ട, വാതഹരമായ ഇലകൾ പ്ലാവില,പേരാലില, കൂവരശ് തുടങ്ങിയവ ഇട്ടു തിളപ്പിച്ച തലേദിവസം തയ്യാറാക്കിയ വെള്ളം കൊണ്ട് ആവിപ്പിടുക്കുന്നതിനാണ് വേദ്‌കുളി. നാരങ്ങാക്കിഴി, ഇലക്കിഴി, മുതലായവ ചെറിയതോതിൽ ഉപയോഗിക്കാം. കുഴമ്പു ഉപയോഗിക്കുമ്പോൾ ചെറുതായി ചൂടാക്കി ഉപയോഗിക്കുന്നതാണ് നല്ലത്. ചികിത്സായ്ക്കു പുറമെ അരിഷ്ടങ്ങൾ, കഷായങ്ങൾ, ഗുളികകൾ, ലേഹങ്ങൾ എന്നിവ യുക്തമായി തിരഞ്ഞെടുത്തു ശരീരത്തിൻറെ ഭാരം കൂടാത്ത വിധത്തിൽ നൽകേണ്ടതാണ്. ധാന്വന്തരം കഷായം, ധാന്വന്തരം കുഴമ്പ്, ദശമൂലാരിഷ്ടം, ജീരകാരിഷ്ടം, കുറിഞ്ഞി കുഴമ്പ്, തെങ്ങിൻപൂക്കുല രസായനം മുതലായവ യുക്താനുസരണം തിരഞ്ഞെടുത്തു ഉപയോഗിക്കേണ്ടതാണ്.

ഈ ആയുർവേദ രീതിയിൽ പ്രസവാനന്തര ശുശ്രൂക്ഷ ചെയ്താൽ നല്ല ഒരു സമൂഹത്തെയും ഭാവി തലമുറയെയും വാർത്തെടുക്കുവാൻ സാധിക്കും എന്നതിൽ ഒരു സംശയമില്ല.